HOME  |  Servicio  |  Cuido Salud Hubenil

Cuido Salud Hubenil

Vacunacion Escolar

Gobierno di Aruba ta mantene y sigui programa di vacunacion Internacional, cu e meta pa proteha comunidad di melesanan contagioso cu por causa hopi daño na salud di nos poblacion.

Cuido Salud Hubenil ta e seccion encarga cu vacunacion di muchanan na Aruba y ta traha hunto cu Wit Gele Kruis pa por mantene un bon registro di esaki. Cuido Salud Hubenil ta vacuna muchanan entre 4 y 12 aña (kleuterklas, 5de y 6de klas) na scol pa motibo cu esaki ta e metodo mas eficiente pa localisa tur mucha y garantisa un porcentahe di proteccion mas halto.  

Vacuna cu ta wordo ofreci ta:

Na momento cu un mucha falta of mester haya vacuna segun e schema di vacunacion, e mucha lo ricibi un carta na scol unda mayor mester duna permiso pa e mucha wordo vacuna pa e enfermeranan di Cuido Salud Hubenil.

Certificado di Vacunacion

Cuido Salud Hubenil ta mantene registro di vacunacion di tur mucha cu wordo vacuna pa Wit Gele Kruis y Cuido Salud Hubenil. Na cualkier momento cu un persona mester un certificado di su vacunacionnan pa bay di biahe of pa scol por pasa libremente na Cuido Salud Hubenil pa pidi esaki.

Chekeo Medico y Control di Salud

Cuido Salud Hubenil ta encarga pa duna cuido preventivo na muchanan di 0 te cu 18 aña cu e meta pa proteha y promove e salud social-emotional, mental y fisico di muchanan y hubentud na Aruba. Cuido Salud Hubenil ta monitoria e salud di e muchanan cuminsando na Wit Gele Kruis, despues ta sigui atraves di scol y otro instancianan educacional y social. Pa e mucha por wordo controla pa e enfermeranan di seccion Cuido Salud Hubenil, mayor mester duna permiso atraves di un carta cu e mucha ta ricibi na scol. Mayor of voogd mester firma esaki y entrega esaki bek na e docente. E chekeo medico y control di salud ta ensera entre otro un chekeo di oido, bista, peso y salud dental.

Nutricionista

Sobre peso y obesidad rond mundo y na Aruba ta un factor di riesgo halto cu ta causa hopi daño na salud di un poblacion. Estudionan haci ta mustra cu e problematica aki ta cuminsa cerca nos muchanan. E nutricionista di Cuido Salud Hubenil ta ofrece ayudo na mucha, mayornan y instancianan. Un mucha por wordo manda pa e nutricionista door di e enfermera of dokter di scol despues di su chekeo medico of mayor cu ta interesa pa conseho tambe por tuma contacto cu e seccion aki. E nutricionista ta duna conseho y guia na esnan cu tin problema di peso y tambe tocante dieta special (por ehempel diabetes of cholesterol halto). 

E nutricionista ta desaroya programa educacional riba tereno di alimentacion y movecion. Y ta duna charla/workshop riba tereno di alimentacion y movecion. 

Ortopedagogo

E ortopedagogo di Cuido Salud Hubenil tambe ta hunga un rol importante den e parti di educacion preventivo. E ta duna sosten y guia na scolnan, mayornan y instancianan educativo y social. E sosten y guia aki ta tuma lugar den forma di training individual, workshops y participacion den gruponan di trabou. E ortopedagogo tambe ta contribui na desaroya maneho of protocol riba educacion, comportacion y salud di nos hobennan.

Pa mas informacion por tuma contacto cu Cuido Salud Hubenil na telefoon 5224200 of via email  jgz@aruba.gov.aw

Directie Volksgezondhied Aruba

E Departamento di Salud Publico Aruba, ta responsabel pa e administracion general di salud publico di Aruba.