Vacunacion contra malesanan viral y bacterial ta importante pa e salud publico di un pais. Vacunacion contra malesanan infeccioso a demonstra di a mehora nos calidad di bida, mengua e casonan di malesa y morto di e malesanan aki den e ser humano. P’esey nos ta ofrece e progama di vacunacion na Aruba pa tur mucha entre 0-12 aña, sin importa si nan of nan mayornan tin estadia ilegal na Aruba.

Pa kico?

Pa duna proteccion y asina garantisa e bienestar
comun y e salud di tur mucha na Aruba.

Pa ken?

Muchanan ilegal entre 0-12 aña cu no tin tur vacuna sigun nos programa
di vacunacion, ta haya e oportunidad pa ricibi esakinan.

E servicio aki lo ta gratis y tur informacion lo keda personal y confidencial.

Con lo haci’e?

Lo duna e vacunanan necesario pa completa e schema di vacunacion contra Sarampi,
Bof (cacheton), Rubella (sarampi aleman), Difterie, Tetanus, Kinkhoest, Polio,
Pneumococ, Hepatitis B y HPV (Human Papilloma Virus).

 

E schema di vacunacion di Aruba ta e siguiente:

Tabel vaccinatie

HepB: vacuna contra Hepatitis B

DKTP-Hib: vacuna contra Difteria, Kinkhoest, Tetanus, Polio, y Pemofilus Influenzae tipo B

Pneu: vacuna contra Pneumococ

MMR: vacuna contra Cacheton (Bof) Sarampi (Mazelen) y Sarampi Aleman (Rubella),

DKTP: vacuna contra Difteria, Kinkhoest, Tetanus, y Polio

HPV: vacuna contra Human Papiloma Virus (HPV) * Pa mucha muhe so

Unda pa bai?

Tuma contacto cu un instancia den tabel abou mas serca di bo pa mas informacion y pa traha un cita.

 
  Telefon Whatsapp Email
WGK Noord 281-4514 594-8439 swgk.noord@witgelekruisaruba.org
WGK Dakota 281-4515 594-8476 swgk.dakota@witgelekruisaruba.org
WGK Santa Cruz 281-4517 594-8437 swgk.stcruz@witgelekruisaruba.org
WGK San Nicolaas 281-4523 594-8443 swgk.sannic@witgelekruisaruba.org
Jeugdgezondheidszorg 522-4294   jgz@dvg.aw

 

Corda cu e servicio aki ta gratis y tur informacion lo keda personal y confidencial

Preguntanan mas comun:

Kiko ta un vacuna?

Un vacuna ta un producto cu ta wordo duna na muchanan chikito pa protehanan contra malesanan peligroso y tin biaha hasta mortal. E vacuna ta stimula e defensa natural di e curpa y ta prepara e curpa pa combati malesanan mas lihe y efectivo.

Con un vacuna ta funciona?

Un vacuna ta yuda e sistema imunologico combati un infeccion dor di causa un reaccion specifico contra un malesa. Bo sistema imunologico lo sa con pa combati e infeccion si den futuro e virus of bacteria ey infecta bo curpa.

Vacuna por ta peligroso?

No. Un vacuna ta safw. Bo yiu tin un chens mas grandi pa wordo afecta negativamente door di un malesa infeccioso cu e vacuna mes. Tur vacuna mester wordo getest pa wak si nan ta safe y mester pasa dor di varios test clinico riguroso prome di pone pa uzo publico.

Pa kiko mi tin cu vacuna mi yiu?

Vacuna ta salba bida. A calcula cu e vacuna contra Sarampi a yega di preveni mas o menos 23 miyon di morto entre aña 2000 y 2018.
Vacuna ta yuda proteha bo yiu contra malesanan cu por causa daño serio of morto especialmente den hendenan unda e sistema imunologico ta den desaroyo manera ta e caso di un mucha chikito.
P’esey ta importante pa vacuna bo yiu. Sino tin chens cu malesanan hopi contagioso por regresa manera Sarampi, Difteria y Polio cu den pasado tabata un problema pa salubridad publico na hopi pais.

Mi yiu por soporta tur e vacuna?

Si. Mayornan ta preocupa cu varios vacuna pareuw por ta dimas pa e sistema imunologico di nan yiu. Pero muchanan ta bin den contacto cu miles di microbionan tur dia. E hecho ta cu un simpel griep of dolor di garganta por pone un peso hopi mas grandi riba e sistema imunologico di un mucha cu e vacuna mes.

Mi mester vacuna mi yiu ainda maske e malesanan no ta circula den nos comunidad?

Si. Por ta e malesanan a no ta circula na Aruba of den nos region, nan ta keda peligroso y e por plama di un area endemico pa otro parti di mundo via di e coneccionnan extenso di pais pa pais.

Kiko ta “herd immunity”/imunidad colectivo?

Ora suficiente hende den nos comunidad ta immuun contra cierto malesanan specifico por papia di “herd immunity” of imundad colectivo. Den e caso aki e malesa no por plama asina facil di persona pa persona dor cu e mayoria di e hendenan ta immuun caba contra dje. E imunidad colectivo ta forma un capa di proteccion pa tur hende incluso e persona no vacuna. E imunidad colectivo tambe ta yuda preveni cu surgi brote den futuro dor di evita plamamento di malesanan. E malesanan aki ta bira scars y hasta desparece por completo den e comunidad.

Mi yiu por bira malo dor di e vacuna?

Vacuna ta safe. E malesa of malestar causa dor di e vacuna no ta sosode hopi y si tin reaccion e ta tiki manera dolor na e sitio di vacuna of tiki keintura y no ta dura hopi. Por trata e reaccionan aki cu un remedi pa kita dolor of keintura manera paracetamol of por pone un paña friu riba e luga di inyeccion. Si bo ta keda preocupa por tuma contacto cu bo dokter di cas of cu Wit Gele Kruis.

Investigacion extensivo a mustra cu no tin relacion entre vacuna y autismo.

Cua malesanan e vacunanan por preveni?

Vacunanan ta proteha bo yiu contra malesanan serio manera polio cu por causa paralisis; Sarampi cu por causa daño cerebral of cieguedad; y Tetanus cu por causa contraccionnan masha doloroso di e musculonan y dificultad pa come y hala rosea en especial den baby recien naci. Pa un lista di e vacunanan mas comun y e malesanan cu nan ta preveni por consulta e lista concerni.